Predikuesi mysliman turk, Fethullah Gylen, i cili shpesh herë është akuzuar nga Ankaraja se qëndronte pas grushtit të dështuar të shtetit të vitit 2016, ka vdekur në Shtetet e Bashkuara, aty ku ai jetonte, shkruan A2 CNN. Gylen ishte 83 vjeç. Gylen ndërtoi një lëvizje të fuqishme islamike në Turqi dhe më gjerë, por i kaloi vitet e tij të mëvonshme i akuzuar për orkestrimin e një tentative grusht shteti kundër liderit turk Tajip Erdogan, akuza të cilat ai i mohoi.
Disa portale turke të cilat publikojnë predikimet e Gylenit, theksuan në X se Gylen kishte vdekur të dielën në mbrëmje në spital kur po trajtohej. Gyleni ishte dikur aleat i Erdoganit, por ata u bënë rival kryesor politikë. Erdogan e konsideroi atë përgjegjës për tentativën për grusht shteti të vitit 2016, në të cilën ushtarët turk komanduan avionë luftarakë, tanke dhe helikopterë. Rreth 250 njerëz u vranë në përpjekje për të marrë pushtetin.
I lindur në vitin 1941, Gylen ishte një imam i thjeshtë për gjysmën e parë të jetës së tij. Në një biografi në internet të publikuar nga lëvizja Gylen, thuhet se pasi u tërhoq nga predikimi në vitin 1981, fokusi i tij u zhvendos nga aktivitetet fetare në ato shoqërore, shumë prej të cilave përfshinin nisjen e sipërmarrjeve të reja, veçanërisht sipërmarrjeve mediatike dhe projekteve arsimore – fusha që në atë kohë ishin hapja ndaj privatizimit, shkruan A2 CNN. Ndikimi i Gylenit në shoqërinë civile u rrit në mënyrë të qëndrueshme gjatë viteve 1980 dhe 1990 – si dhe ndjekësit e tij: Shumë prej atyre që Gylen promovoi në organizatat e tij ose arsimimin e të cilëve ai financoi me shkollat e tij thuhet se kanë ndjerë një borxh personal ndaj predikuesit përçarës.
Pasi u rizgjodh në vitin 2007 me një mandat më të fortë, AKP nën udhëheqjen e Erdogan u bë më e hapur me ideologjinë e saj islamike. Brenda një viti, ajo do të kthente akuzat kundër Gylenit, duke sinjalizuar një gatishmëri për të bashkëpunuar me klerikun dhe lëvizjen e tij globale: Gyleni kishte krijuar një perandori mbresëlënëse biznesi në vitet që nga mërgimi i tij i vetë-imponuar.
Rrjeti i tij i mediave në Turqi dhe jashtë saj ishte bërë gjithnjë e më i fuqishëm; shkollat e tij po kujdeseshin për gjeneratën e ardhshme të ndjekësve të devotshëm por me mendje sipërmarrëse në Turqi; dhe bankat e tij lehtësuan lëvizjen dhe transferimin e fondeve midis botës perëndimore dhe Lindjes së Mesme, ku çështjet financiare të disa vendeve drejtohen nga parimet islame.
Gylen jetonte në mërgim në Shtetet e Bashkuara që nga viti 1999. Lëvizja e tij u bë ‘mollë sherri’ edhe në Shqipëri, deri edhe tek përurimi i xhamisë së madhe të Namazgjasë ditë më parë, ku u desh që në ceremoni të mos merrte pjesë kreu i Komunitetit Mysliman, Bujar Spahiu, pasi cilësohej si pjesë e lëvizjes “Gyleniste” dhe të zëvendësohej nga myftiu i Tiranës.
