Gaza është një “ferr në tokë” i vërtetë për një milion fëmijë që jetojnë atje, me gati 40 që vdesin çdo ditë për një vit, sipas UNICEF.
Më shumë se një vit pas fillimit të luftës në Rripin e Gazës, “fëmijët vazhdojnë të vuajnë çdo ditë në mënyrë të papërshkrueshme”, tha zëdhënësi i Fondit të Kombeve të Bashkuara për Fëmijët, James Elder, në një konferencë për shtyp në Gjenevë. “Gaza është mishërimi i vërtetë i ferrit në tokë për një milion fëmijët e saj. Situata po përkeqësohet dita-ditës, pasi ne jemi dëshmitarë të efekteve të tmerrshme të sulmeve ajrore dhe operacioneve ushtarake”, vuri në dukje ai.
“Nëse ky nivel tmerri nuk e zgjon njerëzimin tonë dhe nuk na nxit të veprojmë, atëherë çfarë do të ndodhë?”, pyeti ai.
Pas sulmit vdekjeprurës të 7 tetorit 2023 të Hamasit ndaj Izraelit që shkaktoi luftën, vlerësimet “konservatore” thonë se më shumë se 14,100 fëmijë janë vrarë në Gaza. Kjo do të thotë se “rreth 35 deri në 40 vajza dhe djem vriten çdo ditë në Gaza pas 7 tetorit”, shtoi Elder, duke theksuar se shumë viktima mbeten të varrosura nën rrënoja.
Sa për të mbijetuarit, ata nuk kanë ku të shkojnë për të qenë të sigurt. “Ku mund të shkonin fëmijët dhe familjet e tyre? Ata nuk janë të sigurt në shkolla dhe strehimore. Ata nuk janë të sigurt në spitale. Dhe ata sigurisht nuk janë të sigurt në kampet e mbipopulluara, “tha Elder.
Tetorin e kaluar, Unicef-i raportoi se Gaza ishte kthyer në një “varrezë për mijëra fëmijë”. Dy muaj më vonë, ai e përshkroi enklavën si “zonën më të rrezikshme në botë për fëmijët”.
