Kremlini tha të martën se Rusia do të donte që Turqia dhe Siria të përmirësonin marrëdhëniet me njëra-tjetrën. Reagimi erdhi pas lajmeve se Presidenti sirian, Bashar al-Assad, do të zhvillojë një takim zyrtar me homologun turk, Recep Tayyip Erdogan në Moskë.
Sipas të përditshmes turke “Daily Sabah”, e cila citonte burime që kishin dijeni mbi çështjen, takimi mund të mbahet në gusht dhe Presidenti rus, Vladimir Putin, do të ishte ndërmjetës i bisedimeve.
“Shumë shtete dhe sigurisht Rusia si vend që luan rol të rëndësishëm në rajon, janë të interesuar për të ndihmuar dy shtetet që të vendosin marrëdhënie”, tha zëdhënësi i Kremlinit Dimitry Peskov, në një konfernecë për mediat.
Asad, aleat i ngushtë i Putinit, tha në korrik se do të takohej me Erdoganin vetëm nëse bisedimet mes dy shteteve do të përqendroheshin te çështja kyçe, mbështetja e Turqisë për grupet që Siria i quan terroriste dhe tërheqjen e trupave turke nga territori sirian.
Peskov nuk konfirmoi nëse takimi në Moskë do të mbahej apo jo, por tha nuk ishte në gjendje të jepte më shumë informacion lidhur me këtë çështje.
