Nuk do të ketë ulje të taksave doganore për importimin e makinave të përdorura pas vitit të ri. Drejtoria e Doganava të Maqedonisë së Veriut, në një sqarim dhënë për Alsat ka përgënjeshtruar informacionet e tilla, duke shtuar se për uljen e taksave nevojiten ndryshime ligjore, të cilat për momentin nuk janë në plan.
“Drejtoria Doganore është përgjegjëse për zbatimin e Ligjit për taksën e mjeteve motorike dhe akteve nënligjore dhe mbledh taksën e mjeteve motorike gjatë importit në tregtinë e brendshme. Ju njoftojmë se nuk ka ndryshim të ligjit në pjesën që ka të bëjë me llogaritjen dhe pagesën e taksës së automjeteve motorike”, thonë nga Drejtoria e Doganave të Maqedonisë së Veriut.
Maqedonia e Veriut importon makina nga Evropa, por edhe nga vendet aziatike dhe sipas të dhënave nga Drejtoria Doganore , 31 makina u importuan nga Koreja e Jugut në vitin 2024 trend që në rajon ka përmasa shumë më të mëdha në krahasim me vendin tonë. Nga janari i vitit 2024 deri në fund të muajit tetor rezulton që në Maqedoni të Veriut të jenë importuar mbi 32 mijë makina, përkatësisht rreth 3200 makina cdo muaj. Në pesë vitet e fundit, pa përfshirë vitin 2024, numri i makinave të importuara nga viti 2018 deri në vitin 2023 ishte 177 mijë, 28 mijë prej tyre të reja dhe 149 makina të përdorura. Vlerësimet tregojnë se me rritjen e importit është trefishuar edhe numri i makinave për kokë banori. Në vitin 2007, vendi ka regjistruar 120 vetura në 1.000 banorë, ndërsa në vitin 2024 mesatarja ka arritur në 302 vetura në 1.000 banorë.
