Pamje që nuk i kishte përjetuar për rreth tetë vjet, Alepo, vendi i dytë më i madh në Siri, po i përjeton sërish që pasditen e djeshme, me pushtimin e befasishëm të rebelëve xhihadistë dhe aleatëve të tyre.
Luftimet me ushtrinë qeveritare të Asadit ishin të ashpra dhe zgjatën për orë të tëra, ndërsa autoritetet siriane u detyruan të mbyllnin aeroportin e Aleppos dhe të gjitha rrugët që të çojnë në qytet në orët e para të së shtunës, thanë tre burime ushtarake për Reuters.
Luftëtarët e opozitës, të udhëhequr nga grupi militant islamik Hayat Tahrir al-Sham, nisën një spastrim të befasishëm të qyteteve të kontrolluara nga qeveria këtë javë, duke arritur në Alepo gati një dekadë pasi u dëbuan nga Asadi dhe aleatët e tij.
Siç pretendojnë ata, kanë arritur në zemër të qytetit.
Në fakt, siç informoi një organizatë joqeveritare për Agence France-Presse, ata kanë marrë përafërsisht gjysmën e Alepos, duke arritur deri në kalanë historike të qytetit.
“Gjysma e qytetit të Alepos është tani nën kontrollin e (organizatës xhihadiste) Hayat Tahrir al-Sham dhe organizatave aleate me të,” tha Rami Abdel Rahman , drejtori i Observatorit Sirian për të Drejtat e Njeriut.
Të paktën 277 njerëz janë vrarë në luftime, sipas një numërimi të mëparshëm nga organizata joqeveritare, e cila është e bazuar në Britani dhe mbështetet në një rrjet të gjerë burimesh në Siri.
Këto janë përplasjet më të përgjakshme që nga viti 2020 në sektorin e Sirisë ku provinca e Alepos, e kontrolluar në pjesën më të madhe nga regjimi i presidentit Bashar al-Assad, kufizohet me Idlib, bastionin e fundit të madh të xhihadistëve dhe rebelëve.
Rusia, një nga aleatët kryesorë të Asadit, i ka premtuar Damaskut ndihmë shtesë ushtarake për t’iu kundërvënë rebelëve, thanë dy burime ushtarake, duke shtuar se materiali i ri do të fillojë të arrijë brenda 72 orëve të ardhshme.
