Qeveria e Kosovës e ka miratuar Projektligjin për buxhetin për vitin 2025, i cili është në vlerë 3.6 miliardë euro.
Kryeministri i vendit, Albin Kurti tha se buxheti i vitit të ardhshëm do të ketë rritje për 300 milionë euro apo 8.8 për qind, krahasuar me vitin 2024.
Ai para kabinetit qeveritar të mërkurën tregoi në detaje se nga do të shkojnë mjetet buxhetore.
“Për vitin 2025 buxheti i projektuar shënon nivelin 3 miliardë e 608 milionë euro. Kjo është për 300 milionë euro, apo shprehur në përqindje për 8.87 për qind më i lartë sesa ai në vitin 2024. Nga ky buxhet 916.5 milionë euro do të shkojnë për pagat e sektorit publik, duke përfshirë edhe rritjen e pagave…Te kategoria mallra dhe shërbime kemi planifikuar se 105 milionë euro t’i ndajmë për nevoja të shëndetësisë. Në Ministrinë e Shëndetësisë dhe ShSKUK që të sigurohen barnat esenciale dhe materiali shpenzues përkatës, ndërkaq 87 milionë euro të tjera i kemi planifikuar për nevoja të sigurisë dhe mbrojtjes që do të shkojnë në municion, pajisje dhe furnizime të nevojshme, ashtu që policia dhe ushtria t’i kryejë detyrat me efikasitet të plotë. Për pensionistët tanë kemi buxhetuar edhe 100 milionë euro të tjera shtesë për të mbuluar rritjen e pensioneve që tashmë e kemi miratuar…Për investime kapitale në infrastrukturë kemi ndarë 930 milionë euro të cilat do të shkojnë në rehabilitetim, ndërtim të hekurudhave dhe ndërtim të rrugëve rajonale dhe autostradave. Rruga Prizren-Tetovë, hekurudha që na lidh me portin e Durrësit janë disa nga projekte”, tha ai.
Kurti foli edhe për premtimet e partive opozitare për rritje të pagave që sipas tij janë boshe e si kundër vlerë e vendimeve që ai i quajti të mira qeveritare.
“Ky do të jetë buxheti i katërt për këtë mandat, por i pari për mandatin që na pret. Andaj që të jeni të sigurtë se ministrat tanë janë përkujdesur që buxhetet e ministrive të tyre t’i dizajnojnë si për veti. Ndërkohë, tash që zgjedhjet po afrohen, po dëgjojmë shumë premtime boshe opozitare si kundër-vlerë e vendimeve të mira qeveritare. Por për një gjë duhet të jemi të sigurt se emisionet humoristike dhe qeverisja e përgjegjshme nuk duhet të ngatërrohen”, shtoi Kurti.
Në anën tjetër, ministri i Financave, Hekuran Murati, tha se sipas vlerësimeve qeveritare rritja ekonomike gjatë këtij viti do të jetë 4.5 për qind, ndërsa për vitin e ardhshëm tha se presin që do të jetë 5.6 për qind.
“Sipas vlerësimeve tona më të fundit, ekonomisë së Kosovës apo rritja gjatë vitit aktual pritet të jetë rreth 4.5 për qind në terma real. Të hyrat buxhetore ashtu si në vitin e mëparshëm kanë vazhduar performancën e tyre tejet të kënaqshme gjatë periudhës janar-shtator të vitit 2024, duke shënuar një rritje të konsiderueshme prej më shumë se 7.1 për qind, e cila kur krahasohet me periudhën e njëjtë të vitit të kaluar i bie 150 milionë euro më tepër. E njëjta tendencë pritet të karakterizohet edhe në pjesën e mbetur të vitit. Sa i përket projeksioneve për vitin e ardhshëm, përditësimi i tyre e konfirmon vazhdimin e rritjes ekonomike më të lartë sesa nivelet historike të vendit. Tani që kemi ngadalësimin dhe uljen e normës së inflacionit nën nivelin 2 për qind, mund të them se ekonomia e vendit tonë po i kthehet potencialit të rritjes ekonomike, që për vitin e ardhshëm presim të jetë 5.6 për qind në terma real”, theksoi ai.
Krahas kësaj, Murati bëri të ditur se normat e reja tatimore për bizneset do të hynë në fuqi nga viti 2026 dhe jo nga viti 2025, ashtu siç është paraparë në Ligjin për tatimin në pronë.